Wild imagination पदार्थांचे..

कॉलेज मधे असताना मैत्रिणी बरोबर ET ( Extra Terrestrial) नावाचा एक इंग्रजी सिनेमा पाहायला गेलो, खूप काही भव्यदिव्य अनाकलनीय पडद्या वर दीड तास पाहून बाहेर पडलो, एका वेगळ्याच विश्वात जाऊन परत आल्याचा साक्षात्कार झाला..त्यावेळी माझी मैत्रीण म्हणाली, "Americans really have a wild imagination! ". हे वाक्य माझ्या मनात कायम घर करून राहिले. आणि याची प्रचिती मला आमच्या ३ वर्षाच्या US वास्तवात; या प्रसंगाच्या तब्बल २५ वर्षा नंतर आली. ज्यावेळी आपण अगदी साधेसुधे विषय हाताळत होतो, त्यावेळी Americans,  ET सारखे विषय घेऊन सिनेमा बनवत.. आता सिनेमा आणि पदार्थ याचा काय संबंध असे वाटणे आपल्याला साहजिकच आहे. पण आज मीही असेच 'wild imagination' केले आणि हे - हे जिन्नस घातले तर होणारा पदार्थाची चव कशी लागेल, याचा अंदाज बांधला आणि मग तो कृतीत आणला..म्हणून तर कॉलेज मध्ये असताना पाहिलेल्या सिनेमा ची आठवण येथे सांगाविशी वाटली..

त्याचे असे झाले, करोना च्या साथीमुळे अनेक सल्ले आपसुक पहायला आणि ऐकायला मिळाले..काय करा आणि काय करू नका..एक ना दोन..

त्यात एका केरळी डॉक्टरांची मुलाखत ऐकली. त्यांच्या मते, फळापेक्षा बियात जास्त खनिजे असतात, तेव्हा फळां बरोबर बिया पण खा! विषेतः पपयी आणि कलिंगड..झाले तेव्हा पासून नवा उद्योग मागे लागला..

कलिंगडाचा सिझन संपलाच होता, त्यामुळे छोटी कलिंगडेच बाजारात मिळत होती, त्याच्या बिया पण तसल्याच छोट्या असल्यामुळे फोडीबरोबर खाल्या गेल्या, पण पपईच्या कश्या खाणार? त्या धुवून वाळवून रोज १-२ खायच्या असे ठरले..

घरात रोजच फळे येतात, त्यामुळे बियांचे प्रमाण वाढले, कसे आणि कधी खायच्या येवढ्या बिया, अश्या विचारात असतानाच, घरी केलेली लसणाची कोरडी चटणी संपली..मग काय? मीही माझे wild imagination वापरून एक कोरडी चटणी केली..नामकरण आता तुम्हीच करा बाई!

अर्धी वाटी  लाल भोपळ्याच्या बिया

एक मोठा चमचा द्राक्षाच्या बिया

अर्धी वाटी पपईच्या बिया

एक वाटी शेंगदाणे

२ चमचे तीळ ( मी काळे तीळ घेतले)

२ चमचे लाल तिखट

१ चमचा मीठ

१ चमचा मोहरीचे तेल ( मोहरी ही चालेल)

सर्व यथावकाश एक एक करून खमंग भाजले आणि अगोदर सर्व बिया बारीक मिक्सी वर दळून घेतले, नंतर शेंगदाणे, तीळ, तिखट, मीठ सर्व एकत्र त्यावर घालून बारीक दळले. पण मिक्सी मध्ये चटणीचा भुगा होतो म्हणून चमचाभर मोहरीचे तेल टाकून परत एकदा फिरवले, त्यामुळे चटणीचा छान गोळा झाला आणि चटणी तयार ! मग थोडी चव घेऊन पाहिली.. आहाहा.. एकदम अप्रतिम खमंग बघा तुम्हाला पटली तर करून पहा..

तळ टिप: हा बिया खाण्याचा खटाटोप येव्हढ्याच करिता, कारण यात असलेली खनिजाचा ( minerals) मुळे आपली रोग प्रतिकार शक्ती भरपूर वाढते.